मुंबई : लोकसभा निवडणुकीसाठी भाजपनं मुंबईतून आतापर्यंत दोन उमेदवार दिले आहेत. भाजपचे मुंबईत तीन खासदार आहेत. पैकी दोन जागांवर भाजपनं उमेदवार जाहीर केले आहेत. विशेष म्हणजे दोन्ही जागांवर भाजपनं विद्यमान खासदारांचं तिकीट कापलं आहे. त्यानंतर आता तिसऱ्या जागेवरही भाजप नवा चेहरा देण्याच्या तयारीत आहे. या जागेसाठी ज्येष्ठ सरकारी वकील उज्ज्वल निकम यांचं नाव चर्चेत आहे.
उत्तर मध्य मुंबई लोकसभा मतदारसंघाच्या खासदार पूनम महाजन यांचं तिकीट कापलं जाण्याची दाट शक्यता आहे. मात्र अद्याप तरी भाजपला या ठिकाणी चांगला उमेदवार मिळालेला नाही. मुंबई भाजपचे अध्यक्ष आशिष शेलार यांचा वांद्रे पश्चिम मतदारसंघ महाजन यांच्याच मतदारसंघात येतो. त्यांना लोकसभेसाठी विचारणा करण्यात आली. पण त्यांनी निवडणूक लढवण्यास स्पष्ट नकार दिला. त्यामुळे भाजपनं निकम यांच्या नावाची चाचपणी उत्तर मध्य मुंबई मतदारसंघासाठी सुरू केली आहे.
भाजपच्या केंद्रीय नेतृत्त्वानं उत्तर मध्य मुंबईत तीन सर्व्हे केले. त्याचे अहवाल महाजन यांच्या विरोधात आहेत. त्यामुळे इथून नवा चेहरा देण्याचा भाजपचा प्रयत्न आहे. वरिष्ठ सरकारी वकील असलेल्या उज्ज्वल निकम यांच्या नावाचा विचार भाजपकडून सुरू आहे. २६/११ च्या दहशतवादी हल्ल्यानंतर उभा राहिलेला खटला, कोपर्डीतील बलात्कार यांच्यासह अनेक संवेदनशील प्रकरणं निकम यांनी हाताळली आहे. सरकारी वकील म्हणून त्यांनी बाजू मांडली आहे. त्यामुळे जनमानसातील त्यांची प्रतिमा चांगली आहे. याचा फायदा भाजपला होऊ शकतो असा युक्तिवाद भाजपमधून केला जात आहे.
आशिष शेलार यांना राज्याच्या राजकारणात राहायचं आहे. दिल्लीत जाण्याची त्यांची इच्छा नाही. त्यामुळे ते लोकसभा निवडणूक लढवण्यास उत्सुक नाहीत. त्यांनी नकार दर्शवल्यानं अभिनेत्री माधुरी दीक्षित यांच्या नावाची चाचपणी भाजपकडून करण्यात आली. पण त्यांनीही निवडणूक लढवण्यास असमर्थतता दर्शवली. त्यानंतर गेल्या आठ दिवसांपासून निकम यांच्या नावाचा विचार सुरू असल्याचं समजतं. पण यावर भाजपचे नेते जाहीरपणे बोलण्यास तयार नाहीत.